Бугун, яъни 19-октябрь куни соат 17:00да Ўзбек Миллий Академик драма театрида “Қадринг баланд бўлсин, она тилим!” халқаро танловининг тантанали тақдирлаш маросими бўлиб ўтди. Бунда, “Энг яхши бадиий асар - наср”, “Энг яхши бадиий асар - назм”, “Публицистик чиқишлар”, “Ўзбек тилининг хориждаги тарғиботи”, “Ижтимоий видеороликлар” йўналишлари бўйича бир гуруҳ ижодкорлар рағбатлантирувчи ўринлар билан тақдирландилар. Тадбир мумтоз куй-қўшиқлар, мавзу доирасидаги видеороликлар, “Жинлар базми” ҳамда “Алишер Навоий” спектаклидан парча намойишлари билан мазмунга бой, рангин ва завқли тарзда бўлиб ўтди.